Zjurie

Zjurering van de Kepèlleprieës

Alle meziekgezelschappe di-j zich oppe tieëd opgegaeve hebbe en mei-j doon aan ut kepélle festival van ‘De Lindeboom Slaag umme Mêrrentj’ gaon gezjureerdj waere as ze spuuele oppe Aoje Mêrrentj in Wieërt op ein van de drej podia ( Slaagsjeep) die dao staon opgestèldj en zeen ingerichtj.
De zjurering vingtj oppe ieërste plaats doeër ein vakzjurie di-j wardieërtj op de vollegendje kriteria… ( Det zeen de zake hoeë ze op lètte…. Wejjae wul!);

Wisseltrofee Lindeboom Slaag um de Mêrrentj

Waas ut meziekgezelschap op tieëd op ’t podium? En… Waas ut meziekgezelschap op tieëd kloar?

Muziek.    ( Haard, zaocht, snel, Russisch, langzaam, vals, helder, Gregoriaans, blauw, groof, dik, fieën, werrem, soepel, heit, mager, Oeësterieëks…….  en zoeë wieter)

Kontakt met ’t pebliek. 
( Wisselwerking, chemie, geuftj ut optraeje enerzjie en plezeer in ’t pebliek?  Goan de minse biej ut zeen, huuere én belaeve van ut meziekgezelschap uut eur daak? Weurtj ‘dr haard gekaaktj doeër ut publiek?)

Kleijjing, uutdossing.
(Kwoome de muziekânte allemoal in unne zwerte, blauwe of greune euveral of woor ut ’n gezelschap van kleurige kostuums of stoofjés in spetterendje kluuere, geschminktj, opgetutj en lekker roekendj?)

De waardering van de zjurie gieët per kriterium  in de vollegendje pûntereeks die opluiptj nao maote van baeter wardieëring;

1 3 5 7 9 11   ( en verder niks)

De vakzjurie zal op basis van de boeëvestaondje zjurering de bèste drej meziekgezelschappe selektere en die drej zulle in de aanfrondendje meziek (zieë)Slaag um de Mêrrentj doeër ut publiek gewardieërtj waere met behullep van kaâk en klap maeters. Tiejus dae aafsloeëtendje Meziekslaag zal ut bèste meziekgezelschap boove koame drieëve……………… 

---

Zjurieëring van de Kolderprieës

Ein kôldergezelschap es ‘ne einling, ’n duo of ein gruupke minse( tot 111 persoeëne) die ein kolderieke prizzentasie, ein vasteloavus kunststök, ein processie, ein tenieëlstök, ein circusvuuerstèlling of wat angers in hoeës hebbe en dao ein breid Vasteloavus pebliek van wille laote kinnisneme en laote geneete….  Det kan en moog dus van álles zeen astj mer Vasteloavundj es…

Dieës koldergezelschappe trei-je op in, vuuer of op de vollegendje kefees in de Wieërter binnestad;
Timoz, de Hermeniej, de Gotcha, Du Commerce, ’t Swaentje en de Tramhalte.

Knauwel;
Onnuuëzeligheid en schaele zeiver -  kolder gehalte - loomp, goonsdig of blauw en leecht verteerbaar…

Vuuerdracht;
Akteersjap, oeëverdracht noa ’t pebliek. Wiej estj gespuueldj…. Bäöke de minse?

Muzikale omlieësting;
Es d’r sprake van bezundjer muzikaliteit of sjuust bezundjer weinig muzikaliteit. As allebei dees kriteria aan de daag gelagdj waere es de skore ’t hoeëgst.

Motto / idee;
Orizjinaliteit.  Es ut good gevônge? Huuertj ut beej vasteloavundj? Es ’t aktuweel of sjuust zoeë aojerwets detj um te bäöke es?

De pûnte telling es as vollegtj ( Wej hoeëger ut pûnt wei-j baeter de wardieëring!)

1, 3, 5, 7, 9 of 11

De Fanfaar Bronchitia 1676 Noeëtekraker wisseltrofee.

Tiedus de Lindeboom Slaag um de Mêrrentj zeen zoeë wei-j áltieëd  naeve ieëwige roem de gebroeëkelikke hoeëfdprieëze te winne;   De  Kepélle Prieës  en de  Knouwelprieës

Vanwege de nowe invulling van Lindeboom Slaag um de Mêrrentjut es d'r ouch ‘ne bezundjere wisselprieës;

"De Fanfaar Bronchitia 1676 Noeëtekraker"

Dieëze wisselprieës es ingesteldj en beschikbaar gesteldj  doeër ’t ieërste Wieërter kepelgezélschap; Fanfaar Bronchitia.
Dit gezélschap heef vanaaf 1976 doeër hieël Europa gereis-j en allerlei minse geammezeerdj.  Drejenderdig jaor vasteloavuservaring en nog almer en d’n hieële tieëd hei-j op bezig met Vastenoavundj. In die drejendertig jaor hebbe ze vuuerâl breid gezaete, vôl nuuet gekraaktj en noeëts mieër dan éin meziekstök op de pupiter gatj….

Fanfaar Bronchitia, det moog grösj gezagtj es de ieërste meziekvereiniging die de Wieërter Vastenoavundj muzikaal oppe waereldjkaârt hieef gezatte en dei-j uuteindelik de groondlègger es van ‘de Lindeboom Slaag umme Mêrrentj’.

Dae schitterendje wisselpriês es gemaaktj doeër Wim van Hoetse, ‘ne Wieërter jong dae nao zich jaorelânk oppe vingers te hebbe gehawdj ’n kunstwerk gemaaktj heef det zieëne weerga neet kintj…. Ongeluifelik.

Weem kân ‘De Fanfaar Bronchitia 1676 Noeëtekraker’ winne?

Deze wisselprieës es ingestèldj vör de beste Wieërter kepel
Naeve de gebroeëkelikke kepélle beoeërdeiling door de zjuri zal de zjurie dus uut alle deilneemendje Wieërter kepelle ein kepel uutverkeeze tot winnaar van de‘De Fanfaar Bronchitia 1676 Noeëtekeraker’ wisseltrofee!